ကျန်းမာရေးနှင့် ပတ်သက်သော ဗဟုသုတ၊ လိင်မှုကိစ္စ၊ ရောဂါများအကြောင်း၊ လေ့လာတွေ့ရှိချက်များ၊အစားအသောက်နှင့် လူနေမှုဘဝများ





ဤဘလောဂ့်ဆိုဒ်သည် ဆိုင်မွန်စာကြည့်ဆိုဒ်၏ ပရိတ်သတ်များ တက်ရောက် ဖတ်ရှုခြင်း လွယ်ကူမြန်ဆန် စေရန် ရည်ရွယ်၍ ထပ်မံတိုးထားသော ဆိုဒ်ပွား တစ်ခုသာ ဖြစ်ပါသည်။

Tuesday, December 8, 2015

ကြက်သားမှုန့်က အချိုမှုန့်ထက်ပင် ဘေးထွက် ဆိုးကျိုးများ




ရန်ကုန်၊ ဒီဇင်ဘာ ၈

ဟင်းချက်ရာတွင် အသုံးပြုသည့် အချိုမှုန့်မှာ ဦးနှောက် နှင့် အာရုံကြော အပြင် အခြား ရောဂါများ ဖြစ်စေနိုင်သည့် အတွက် အသားမှုန့်ကို ပြောင်းလဲ အသုံးပြု လာကြသည်။ သို့သော် အသားမှုန့် သည်လည်း ကြာရှည် ခံနိုင်စေရန် ဓာတု ပစ္စည်းများ သုံးထားရသည့် အတွက် အချိုမှုန့် ထက်ပင် ဘေးထွက် ဆိုးကျိုး များနိုင်ကြောင်း မြန်မာနိုင်ငံ စားသုံးသူ ကြိုတင် ကာကွယ်ရေး အသင်း (Consumer Protection Association Of Myanmar) ၏ အတွင်းရေးမှူး ဒေါ်စိုး ကလျာ ထိုက်က မဇ္ဈိမကို ပြောသည်။

"Mono Sodium Glutamate(MSG) ဖြစ်တဲ့ အချိုမှုန့်ဟာ ကျန်းမာရေး အတွက် ဆိုးကျိုး များတယ် ဆိုတာ လူတိုင်းလည်း သိကြပါတယ်။ အဓိကကတော့ အရိုး ပွတာနဲ့ ကျောက်ကပ် ထိခိုက် တာမျိုးတွေပေါ့။ အလားတူပဲ ကြက်သားမှုန့် မှာလည်း ကြက်သား အရသာလေး ပါလေဟန် ထည့်ပြီး MSGနဲ့ တာရှည်ခံ မှိုသတ်ဆေးတွေ ထည့်ထားတာ ဆိုတော့ ရေရှည်မှာ အချိုမှုန့် ထက်တောင် ကျန်းမာရေးကို ပိုမို ထိခိုက် လာစေနိုင်တာ တွေ့ရ ပါတယ်။ ဒါကြောင့် ဒီကြေညာချက်ကို ထုတ်ပြန် ရတာပါ" ဟု ဒေါ်စိုး ကလျာထိုက်က ပြောသည်။

ကြေငြာချက်မှာ ဒီဇင်ဘာ ၆ရက်က လူမှု ကွန်ယက် စာမျက်နှာတွင် ပျံ့နှံ့ခဲ့ပြီး "အချိုမှုန့်တွင် ပါဝင်သော ဓာတု ပစ္စည်းများသည် ဦးနှောက်နှင့် အာရုံကြော ထိခိုက်စေ၍ လေဖြတ် လေငန်း ရောဂါ၊ နှလုံးရောဂါ၊ လေးဖက်နာ ရောဂါ၊ ကျောက်ကပ် ချို့ယွင်း ပျက်စီးသော ရောဂါ၊ ဆီးချို၊သွေးချိုနှင့် သွေးတိုး ရောဂါများကို ဖြစ်ပွားစေ၍ ရှောင်ကြဉ်သင့်ပါသည်။ ကြက်သားမှုန့် တွင်လည်း အချိုမှုန့်နှင့် တာရှည်ခံ မှိုသတ်ဆေးများ၊ ဓာတု ပစ္စည်းများ ပါဝင် သဖြင့် အချိုမှုန့် ထက်ပင် ပိုမို ဆိုးရွားစေ ပါသည်" ဟု ပါရှိသည်။

ကြက်သားမှုန့်သည် အချိုမှုန့်ထက်ပင် ကျန်းမာရေးကို ပိုမို ဆိုးဝါးစေကြောင်း ပြည်တွင်းတွင် သုတေသန ပြု၍ သိရခြင်း မဟုတ်ဘဲ မလေးရှားနိုင်ငံ၊ ပီနန်မြို့ရှိ မလေးရှား CPA မှ ပို့ချသော သင်တန်းမှ ကျန်းမာရေး ဘေးထွက် ဆိုးကျိုးဆိုင်ရာ အသေးစိတ် ရှင်းလင်းချက်များ နှင့် အခြား အမေရိကန်၊ သြစတေးလျ CPA တို့မှ ပြုလုပ် ထားသည့် သုတေသန ပြုထုတ်ပြန်ချက် များကို ကိုးကား၍ ထုတ်ပြန် ခဲ့ခြင်း ဖြစ်သည် ဟုလည်း ၎င်းက ဆိုသည်။

အချိုမှုန့်ကို နှစ်ရှည်လများ အလွန်အကျွံ စားသုံးမှုကြောင့် ဒေါ်စိုးကလျာထိုက်၏ ခင်ပွန်း ကိုယ်တိုင်ပင် ကျောက်ကပ် ထိခိုက်သော ရောဂါ ခံစားနေ ရကြောင်း၎င်းက ပြောသည်။

မြန်မာနိုင်ငံတွင်း၌ အချိုမှုန့် စားသုံးမှု မြင့်တက်ေ နကြောင်း "အမတို့ နိုင်ငံက ဆင်းရဲတဲ့ ဖွံ့ဖြိုးဆဲ နိုင်ငံ ဖြစ်တာကြောင့်လည်း ပြည်သူတွေ၊ အထူး သဖြင့် ဆင်ခြေဖုံးနေ သူတွေက ဈေး သက်သာတဲ့ အချိုမှုန့်ကိုပဲ တွင်တွင် ကျယ်ကျယ် စားကြတယ်။ အမတို့ဘက်က အသိပညာပေး နေတယ် ဆိုပေမယ့် အဲ့ဒီ အ၀န်းအ၀ိုင်း လောက်ပဲ ဆင်ခြင်ကြတာ။ ပြည်သူတွေ အချိုမှုန့် ရှောင်ဖို့ ဆိုတာကတော့ အများကြီး ကြိုးစား ရဦးမှာပါ" ဟု ယင်းက ဆက်လက် ပြောကြားသည်။

ရန်ကုန်မြို့ သင်္ကန်းကျွန်းမြို့နယ်မှ အိမ်ရှင်မ တစ်ဦးက "အရင်ကတော့ အချိုမှုန့်က ကျန်းမာရေးကို ထိခိုက်စေတယ် ဆိုလို့ ကြက်သားမှုန့် ပြောင်းသုံးတာ၊ အခုတော့ ကြက်သားမှုန့်က ပိုဆိုး နေမှတော့ ဆားဖြူး ပြီးစားရမယ့် ပုံဖြစ်နေပြီ။ ဒီလိုမျိုး ဆိုးကျိုးတွေ ရှိတယ်ဆိုတာ ပြည်သူတွေ ဆီကို ထိထိ ရောက်ရောက် ပညာပေး သင့်ပါတယ်"ဟု မဇ္ဈိမကို ပြောသည်။

လက်ရှိတွင် အချိုမှုန့် အသားမှုန့် အစားထိုး ဂျပန် နည်းပညာဖြင့် ပဲပိစပ်၊ ပြောင်းဖူးတို့မှ Yeast ဖောက်ထားသည့် အချိုမှုန့်း အစားထိုး ဟင်းခပ်မှုန့်များ ဈေးကွက်ထဲတွင် ရရှိနေပြီ ဖြစ်သည်။ သို့သော် ထိုအသားမှုန့်များ၏ ကောင်းကျိုး၊ ဆိုးကျိုးကိုမူ ပြည်သူများ အနေဖြင့် မသိရှိ ရသေးပေ။

ကြက်သားမှုန့် ကိုမူ လူလတ် တန်းစားများ အများစု စားသုံးကြပြီး အချိုမှုန့်ကို အများဆုံး စားသုံးသူ များမှာ ကျန်းမာရေး ဗဟုသုတ နည်းသည့် ကျေးလက် တောင်သူများ၊ ဆင်ခြေဖုံးတွင် နေထိုင် သူများ စသည့် အခြေခံ လူတန်းစား အများဆုံး ဖြစ်သည်ဟု ဒေါ်စိုးကလျာထိုက်က ပြောသည်။

"တိုင်းပြည် ဆင်းရဲတော့ ငပိရည်တို့ ကန်စွန်းရွက်ကြော်တို့ အားပြု စားနေရတဲ့ အခြေခံ လူတန်းစား ပြည်သူတွေက အရသာ မရှိ၊ရှိအောင်ကို အချိုမှုန့်တွေ တရားလွန် ထည့်စား ကြတာပေါ့။ တချို့ကျတော့ အချိုမှုန့် မကောင်းမှန်း သိပေမယ့်လည်း အခုမှတော့ မထူးတော့ ပါဘူးဆိုပြီး ဆက်စားကြ တာမျိုးတွေ ရှိတယ်။"၎င်းက ပြောသည်။

ယင်း ဟင်းခတ်မှုန့်များ နှင့် ပတ်သက်၍ မြန်မာနိုင်ငံတွင် သုတေသန ပြုလုပ်ရန် နည်းပညာ နှင့် နည်းစနစ် လိုအပ်ချက် ကြီးမားနေပြီး ပြည်ပသို့ ပို့ဆောင်ကာ စစ်ဆေးမည် ဆိုပါကလည်း စရိတ်ကြီးမြင့် သဖြင့် အခက်အခဲ ရှိနေသည်ဟု သိရသည်။

မဇ္ဈိမ မာလ်တီမီဒီယာ by mizzima

Original link - http://mizzimaburmese.com/article/8316

ဒီပို့စ်လေးကို သဘောကျရင်
လုပ်ပေးခဲ့နော်။

No comments:

Post a Comment